ఓబీసీ రిజర్వేషన్ల పరిమితిపై
మోడీకి రాహుల్ ఛాలెంజ్
కర్నాటక కొల్లార్ ఎన్నికల ప్రచారంలో కాంగ్రెస్ కీలక ప్రకటన
బెంగుళూర్, ఏప్రిల్ 16 : ఓబీసీ 50 శాతం రిజర్వేషన్ల పరిమితిపై బీజేపీ నేతృత్వంలోని పీఎం మోడీ ప్రభుత్వానికి కాంగ్రెస్ అగ్రనేత, మాజీ ఎంపీ రాహుల్ గాంధీ ఛాలెంజ్ విసిరారు. దేశవ్యాప్తంగా ఓబీసీ రిజర్వేషన్లపై ఉన్న 50 శాతం పరిమితి తొలగించాలని కేంద్ర ప్రభుత్వానికి డిమాండ్ చేశారు.
ఆదివారం కర్నాటకలోని కొల్లార్ ఎన్నికల ప్రచార సభలో రాహుల్ గాంధీ ప్రసంగించారు. ఈ సందర్భంగా ఆయన మాట్లాడుతూ ఓబీసీ జనాభా లెక్కలను మోడీ ప్రభుత్వం విడుదల చేయాలని డిమాండ్ చేశారు. ఓబీసీలు, దళితులు, ఆదివాసీలు తమ జనాభా శాతం ఎంతో యావత్ దేశ ప్రజలకు తెలియజేయాలని స్పష్టం చేశారు. ఈ ప్రకటనతో రాహుల్ గాంధీ కర్నాటక అసెంబ్లీ ఎన్నికల ఎజెండాను నిర్దేశించినట్టయిందని విశ్లేషకులు అభిప్రాయపడుతున్నారు. ఓబీసీలు, ఎస్సీ, ఎస్టీల సంక్షేమంపై ప్రధానికి నిజమైన శ్రద్ధ ఉంటే, ఆ వివరాలను విడుదల చేసి కుల గణన ఆధారంగా రిజర్వేషన్లు అమలు చేయాలని రాహుల్ గాంధీ వెల్లడడించారు. లేని పక్షంలో ఓబీసీలు, దళితులు, ఆదివాసీలను ప్రధాని మోడీ అవమానించినట్లే అవుతుందని రాహుల్ వివరించారు.