అగ్నిపర్వం
నేను సైతం ప్రపంచాగ్నికి
సమిధనొక్కటి ఆహుతి ఇవ్వాలని బయలుదేరాను
దారిలో ఉండగానే
నా ఇంటికి నిప్పు అంటించారు
అగ్ని జ్వాలల్లో నా గూడు రగిలిపోతున్నా,
మంటల్లో నా వాళ్లు కరిగిపోతున్నా,
అది చూసికూడా
ఆర్పటానికి ఒక్క చెయ్యి ముందుకు రాలేదు
వారి హాహాకారాలు ఆకాశాన్నంటినా
వినికూడా
ఎవరూ సాయం చెయ్యడానికి
ఒక్క అడుగు ముందుకు వెయ్యలేదు
వారి తలుపులు సైతం తీయలేదు
స్వార్థాన్ని వెచ్చటి దుప్పటిలా కప్పుకున్న లోకం కోసం
సమిధను పట్టుకుని ముందుకు సాగనా?
నాకెందుకు అని తలదించుకునే సమాజం కోసం
నేనెందుకు అని వెనక్కి వెళ్లనా?
జ్వలించని, చలించని ఈ ప్రపంచం కోసం
దాని శ్రేయస్సు కోసం,
ఉరి తీసినా, ఊచకోత కోసినా
ఉగ్ర జ్వాలనవ్వాలనే
వెర్రి ఆలోచనను
ఇక్కడితో వదిలేయనా?
గుండెలో మిన్నంటుతున్న
చండమారుతానికి
అడ్డుకట్టేయనా?
