– తొలి రౌండ్ లోనే ఇంటి బాట పట్టిన స్టార్ టెన్నిస్ ప్లేయర్
– మొదటి రోజే నిష్క్రమణ పాలైన రోహన్ బోపన్న, శ్రీరామ్ బాలాజీ
నిర్దేశం, పారిస్: ఒలింపిక్స్ లో టెన్నిస్ తరపున దేశానికి కచ్చితంగా మెడల్స్ వస్తాయని అనుకుంటే.. తొలి రౌండ్ లోనే దేశానికి చుక్కెదురైంది. సీనియర్ టెన్నిస్ స్టార్లు రోహన్ బోపన్న, శ్రీరామ్ బాలాజీ పారిస్ ఒలింపిక్స్ 2024 మొదటి రౌండ్‌లోనే ఇంటి బాట పట్టారు. వీరి నిష్క్రమణతో టెన్నిస్‌లో భారత్ సవాల్ ఒక్కరోజులోనే ముగిసింది. దీంతో పారిస్ ఒలింపిక్స్‌లో పురుషుల సింగిల్స్‌, డబుల్స్‌లో భారత్ సవాల్ ముగిసినట్లైంది. సింగిల్స్‌లో సుమిత్ నాగల్, డబుల్స్‌లో బోపన్న-బాలాజీ జోడీ రంగంలోకి దిగింది. ఈ రెండింటిలోనూ భారత్ ప్రయాణం తొలి రౌండ్‌లోనే ముగిసింది.
నాగల్ ఫ్రాన్స్‌కు చెందిన కొరెంటిన్ మౌటెట్‌తో ఓడిపోగా, బోపన్న-బాలాజీ జోడీ తొలి రౌండ్‌లో ఫ్రాన్స్‌కు చెందిన గేల్ మోన్ఫిల్స్, ఎడ్వర్డ్ రోజర్ చేతిలో ఓటమిని చవిచూడాల్సి వచ్చింది. తొలి రౌండ్‌లో బోపన్న, బాలాజీ జోడీని మోన్ఫిల్స్, వాసెలిన్‌ జోడీ 7-5, 6-2తో వరుస సెట్లలో ఓడించింది. డబుల్స్‌లో భారత్ క్యాంపెయిన్‌ 76 నిమిషాల్లో ముగిసింది. తొలి సెట్‌లో ఫ్రెంచ్ జోడీకి బోపన్న, బాలాజీ గట్టిపోటీని అందించగా, రెండో సెట్‌లో భారత జోడీ ఏమాత్రం లయలో పడినట్లు కనిపించలేదు.
చివరి క్షణంలో గాయపడిన ఫాబియన్ రెబల్ స్థానంలో వచ్చిన మోన్ఫిల్స్.. ఇంటి ప్రేక్షకుల ముందు అద్భుతాలు చేశాడు. బోపన్నను సుదీర్ఘ ర్యాలీలో నిమగ్నం చేయాలనే ఫ్రాన్స్ వ్యూహం విజయవంతమైంది. దాని కారణంగా బాలాజీని పక్కన పెట్టారు. భారత జట్టు వెస్లిన్ సర్వీస్‌ను బ్రేక్ చేసింది. అయితే ఈ జోరును కొనసాగించలేకపోయింది. మ్యాచ్ ఓ తప్పిదంతో ముగిసింది.
