నిర్దేశం, బెంగ‌ళూరుః ప్రభుత్వ ఉద్యోగం పొందడానికి రాత్ర‌న‌క ప‌గ‌ల‌న‌క చదువుతుంటారు. రాత పరీక్షలో ఎలాగైనా ఉత్తీర్ణత సాధించాలని తీవ్రంగా శ్ర‌మిస్తుంటారు. అయితే, కర్ణాటకలో ప్రభుత్వ ఉద్యోగం పొందాలంటే చదువు మానేసి, స్తంభం ఎలా ఎక్కాలో తెలుసుకోవాలి. లేదంటే ఉద్యోగం అనే మాట మర్చిపోవాలి.
కర్నాటకలోని పవర్ సెక్టార్‌లో గ్రూప్-డి ఉద్యోగం పొందడానికి ఔత్సాహికుల విజయం ఇప్పుడు ఒక సవాలు మీద ఆధారపడి ఉంది. ఆ సవాలు ఏంటంటే.. అభ్యర్థులు 8 మీటర్ల ఎత్తైన కాంక్రీట్ స్తంభాన్ని అధిరోహించాలి. 10 మందిలో 8 మంది ఇది చేయడంలో విఫలమవుతున్నారు. కర్ణాటక పవర్ ట్రాన్స్‌మిషన్ కార్పొరేషన్ లిమిటెడ్ (కెపిటిసిఎల్) స‌హా ఐదు విద్యుత్ సరఫరా కంపెనీలు (ఎస్కామ్‌లు) ద్వారా సుమారు 3,000 గ్రూప్-డి ఉద్యోగాల కోసం రిక్రూట్‌మెంట్ ప్రారంభించారు. అయితే ఫిట్‌నెస్ పరీక్ష సమాచారం బయటకు వచ్చిన తర్వాత అందరూ గందరగోళంలో ఉన్నారు.
2015లో జూనియర్ స్టేషన్ అటెండెంట్, జూనియర్ పవర్‌మ్యాన్ పోస్టులకు పోల్ క్లైంబింగ్ పరీక్ష తప్పనిసరి చేసినందున, అభ్యర్థులకు ఇది పెద్ద అడ్డంకిగా మారింది. ఈ డైరెక్ట్ రిక్రూట్‌మెంట్‌పై అభ్యర్థుల నుంచి నిరసనలు వ్యక్తమవుతున్నాయి. కర్ణాటక పబ్లిక్ సర్వీస్ కమిషన్ లేదా కర్ణాటక ఎగ్జామినేషన్ అథారిటీ నిర్వహించే రాత పరీక్షలను ఆశ్రయించాలనుకునే వారు.
అభ్యర్థులు ఈ పరీక్షలో ఉత్తీర్ణులు కావాలి
పోల్ క్లైంబింగ్: అభ్యర్థులు ఎనిమిది మీటర్ల కాంక్రీట్ విద్యుత్ స్తంభాన్ని ఎక్కాలి.
పరుగు: 100 మీటర్లు 14 సెకన్లలో పరుగెత్తాలి. అలాగే 800 మీటర్ల రేసును మూడు నిమిషాల్లో పూర్తి చేయాలి.
జంపింగ్: ఒక నిమిషంలో 50 సార్లు దూకాలి.
షాట్‌పుట్‌: 5.4 కిలోల బాల్‌ను ఎనిమిది మీటర్ల వరకు విసరాలి.
