ఆకాశ్ ఆనంద్ కు మాయావతి ఆశీస్సులు మళ్ళీ లభిస్తాయా?
– త‌ప్పు చేశాను క్ష‌మించండంటూ ఎక్స్ ఖాతాలో పోస్ట్
– తిరిగి పార్టీలోకి తీసుకోండ‌ని మాయావతికి వేడుకోలు
నిర్దేశం, న్యూఢిల్లీః
బీఎస్పీ సుప్రెమో మాయావతి మేనల్లుడు, అలాగే బీఎస్పీ మాజీ జాతీయ సమన్వయకర్త ఆకాష్ ఆనంద్ తన ఎక్స్ ఖాతాలో ఒక పొడవైన పోస్ట్ చేశారు. తన తప్పులను క్షమించమని, త‌న‌ను తిరిగి పార్టీలోకి తీసుకొమ్మంటూ మాయావతికి విజ్ఞప్తి చేశారు.
ఆకాష్ ఆనంద్ తన ఎక్స్ ఖాతాలో పోస్ట్ చేసి ఇలా రాశారు – “బీఎస్పీ జాతీయ అధ్యక్షురాలు, నాలుగుసార్లు యూపీ ముఖ్యమంత్రి, అనేకసార్లు లోక్‌సభ, రాజ్యసభ ఎంపీగా పనిచేసిన సోదరి (బెహెన్జీ) కుమారి మాయావతిని నా ఏకైక రాజకీయ గురువుగా, నా హృదయపూర్వక ఆదర్శంగా నేను భావిస్తున్నాను. బహుజన్ సమాజ్ పార్టీ ప్రయోజనం కోసం, నా బంధువులను, ముఖ్యంగా నా అత్తమామలను ఏ విధంగానూ అడ్డంకిగా మారనివ్వనని ఈ రోజు నేను ప్రతిజ్ఞ చేస్తున్నాను.”
“ఇది మాత్రమే కాదు, కొన్ని రోజుల క్రితం చేసిన నా ట్వీట్‌కు నేను క్షమాపణలు కోరుతున్నాను. దీని కారణంగా గౌరవనీయమైన బెహెన్జీ నన్ను పార్టీ నుండి బహిష్కరించారు. ఇక నుండి నా రాజకీయ నిర్ణయాలకు సంబంధించి నేను ఏ బంధువు లేదా సలహాదారుడి నుండి ఎటువంటి సలహా తీసుకోనని స్ప‌ష్టం చేస్తున్నాను. గౌరవనీయమైన బెహెన్జీ ఇచ్చిన మార్గదర్శకాలను మాత్రమే అనుసరిస్తాను. అలాగే పార్టీలోని పెద్దలను, వృద్ధులను కూడా గౌరవిస్తాను. వారి అనుభవాల నుండి నేర్చుకుంటాను.
నా తప్పులన్నింటినీ క్షమించి, మళ్ళీ పార్టీలో పనిచేసే అవకాశం ఇవ్వమని బెహెన్జీని విజ్ఞప్తి చేస్తున్నాను. దీనికి నేను ఎల్లప్పుడూ ఆమెకు కృతజ్ఞుడను. పార్టీ, గౌరవనీయ బెహెన్జీ ఆత్మగౌరవాన్ని దెబ్బతీసే ఏ తప్పును నేను భవిష్యత్తులో చేయను” అని ఆకాష్ ఆనంద్ అన్నారు. ఆకాష్ ఆనంద్ ను 3 మార్చి 2025న పార్టీ నుంచి మాయావతి బహిష్కరించారు. గ‌తంలో కూడా ప‌ద‌వుల నుంచి తొల‌గించి తిరిగి తీసుకున్నారు మాయావతి. మ‌రి రెండోసారి ఆకాష్ కు మాయావతి ఆశీస్సులు లభిస్తాయా లేదా అన్న‌ది చూడాలి.
